ເບີໂທລະສັບ: +85621 2130 03/2227 77, ອີເມວ: suthanu1974@gmail.com

ທ່ານລັດຖະມົນຕີ ຮສສ ເນັ້ນໜັກໃຫ້ບັນດາ ຮສສ 4 ແຂວງພາກເໜືອ ເອົາໃຈໃສ່ 7 ໜ້າວຽກ

15-07-2019, 13:59 450

118

ໂອກາດ ທີ່ ທ່ານ ປອ. ຄຳແພງ ໄຊສົມແພງ ກໍາມະການສູນກາງພັກ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ( ຮສສ ) ພ້ອມຄະນະ , ລົງເຄື່ອນໄຫວຢຽ້ມຢາມ, ຊຸກຍູ້ ແລະ ຕິດຕາມວຽງານຂະແໜງແຮງງານ ແລະ ສະຫວັດດີການສັງຄົມ ຢູ່ 4 ແຂວງພາກເໜືອ (ແຂວງຫຼວງນໍ້າທາ, ບໍ່ແກ້ວ, ອຸດົມໄຊ ແລະ ຫຼວງພະບາງ) ໃນລະຫວ່າງ ວັນທີ 11 – 15 ກໍລະກົດ 2019ນີ້, ຜ່ານການຮັບຟັໃນລາຍງານ ຂອງບັນດາ ຮສສ ແຂວງ , ທ່ານ ລັດຖະມົນຕີ ໄດ້ຍ້ອງຍໍຊົມເຊີຍຜົນງານຍາດມາໄດ້ ໃນໄລຍະຜ່ານມາ ພ້ອມທັງຍົກໃຫ້ເຫັນເຖິງສະພາບການຜົ້ນເດັ່ນ ຂອງ ພາກພື້ນສາກົນ ແລະ ພາຍໃນປະເທດ . ພ້ອມທັງ ການຍົກສູງບົດບາດການຳພາ ຂອງພັກ , ກົດລະບຽບຂອງລັດ ກຳແໜ້ນດ້ານການເມືອງແນວຄິດ, ແນວທາງນະໂຍບາຍຂອງ ພັກ ແລະ ລັດ, ຕີຖອຍທຸກກົນອຸບາຍຂອງພວກສັດຕູ, ອິທິກຳລັງປໍລະປັກ ແລະ ກຸ່ມຄົນບໍ່ດີ . ທີ່ພະຍາຍາມແຊກຊຶມ ຫວັງມ້າງເພທຳລາຍ ພັກ ແລະ ອົງການຈັດຕັ້ງລັດ ໂດຍສະເພາະ ໃນຖັນແຖວພະນັກງານ-ລັດຖະກອນ.
ພ້ອມກັນນີ້ ທ່ານ ປອ ຄຳແພງ ໄຊສົມແພງ ໄດ້ເນັ້ນ ໃຫ້ບັນດາຂະແໜງ ຮສສແຂວງດັ່ງກ່າວ ວ່າ: ໃຫ້ພ້ອມກັນຍົກສູງບົດບາດຄວາມສຳຄັນຂອງໜ້າທີ່ການເມືອງ ຄວາມຮັບຜິດຊອບຂອງຂະແໜງການ ຮສສ ໃນແຕ່ລະຂັ້ນໃຫ້ມີຄວາມເຂັ້ມແຂງທາງດ້ານວິຊາການ,ເອົາໃຈໃສ່ປັບປຸງແບບແຜນວິທີເຮັດວຽກ,ມີການຕິດຕາມກວດກາຢ່າງເປັນປົກກະຕິ, ສ້າງກົງຈັກການຈັດຕັ້ງໃຫ້ເຂັ້ມແຂງ ຜ່ານການບຳລຸງຍົກລະດັບຄວາມຮູ້ທາງດ້ານທິດສະດີການເມືອງ ແລະ ວິິຊາສະເພາະ, ສາມາດສ້າງໄດ້ພະນັກງານສືບທອດປ່ຽນແທນ. 
ດ້ານວຽກງານວິຊາສະເພາະ ວຽກງານຂະແໜງ ຮສສ ຕ້ອງໄດ້ປະສານກົມກຽວ ກັບ ຂະແໜງການອື່ນໆ ແລະ ສາມາດນຳໃຊ້ກຳລັງແຮງຈາກສັງຄົມ ເພາະເປັນວຽກທີ່ກ່ຽວພັນກັບຫຼາຍຊັ້ນຄົນ, ຫຼາຍການຈັດຕັ້ງ.
ວຽກງານແຜນການ ແລະ ການຮ່ວມມືສາກົນ ຂອງ ບັນດາແຂວງ ເອົາໃຈໃສ່ເນັ້ນໜັກການສະຫຼຸບຕີລາຄາສະພາບການຈັດຕັ້ງແຜນຜ່ານມາ ໃນແຕ່ລະດ້ານ ຕາມເປົ້າໝາຍ, ຄາດໝາຍ ແລະ ຕົວຊີ້ບອກ ໃຫ້ຖືກກັບສະພາບຄວາມເປັນຈິງ ຜົນສຳເລັດຜົ້ນເດັ່ນ, ຈຸດດີເປັນແບບຢ່າງ, ຈຸດອ່ອນຂໍ້ຄົງຄ້າງ ແລະ ວາາງມາດຕະກາແກ້ໄຂຢາງຈະແຈ້ງ, ຫາກມີອັນໃດຍັງບໍ່ທັນເຂົ້າໃຈລະອຽດ ກໍໃຫ້ປະສານສົມທົບກັບທາງກົມ ເພື່ອຮີບຮ້ອນກະກຽມຕາມກຳນົດເວລາ ແມ່ນ ວັນທີ 15 ຕຸລາ 2019.
ການຄຸ້ມຄອງແຮງງານ ຕ້ອງເອົາໃຈໃສ່ລົງເຜີຍແຜ່ ໂຄສະນາ ບັນດາເອກະສານ ນິຕິກຳ ກ່ຽວກັບແຮງງານ ໃຫ້ຫົວໜ່ວຍແຮງງານໃນທົ່ວແຂວງ, ຕິດຕາມແກ້ໄຂ ບັນຫາຄວາມບໍ່ຍຸຕິທຳ ໃນການໃຊ້ແຮງງານ ໂດຍໃຫ້ມີການກວດກາຫົວໜ່ວຍແຮງງານເປັນປົກກະຕິ ໃຫ້ປະຕິບັດຕາມກົດລະບຽບແຮງງານ, ສັນຍາແຮງງານ, ຄວາມປອດໄພ ແລະ ສຸຂະພາບແຮງງານ. ສຳລັບແຮງງານຕ່າງປະເທດ ທີ່ເຂົ້າມາເຮັດວຽກ ກໍໃຫ້ມີການກວດກາຄືນ ລະບົບການ ສະເໜີເອົາໂກຕ້າ ຂອງຫົວໜ່ວຍແຮງງານ ເພື່ອບໍ່ໃຫ້ມີຮູບແບບນາຍໜ້າ ສະເໜີເອົາແຮງງານທີ່ບໍ່ຖືກເປົ້າ ໝາຍ, ເລ່ລ້ອນ ເປັນຈຳນວນຫຼາຍເຂົ້າເຮັດວຽກ.
ວຽກນະໂຍບາຍຕໍ່ຜູ້ມີຜົນງານ ເຊິ່ງເປັນວຽກງານໜຶ່ງທີ່ສຳຄັນ ແລະ ຕ້ອງການງົບປະມານຈຳນວນຫຼາຍຈາກລັດຖະບານ ຜ່ານມາຂະແໜງ ຮສສ ຂັ້ນທ້ອງຖິ່ນ ທີ່ເປັນຜູ້ຄົ້ນຄວ້າ, ສັງລວມ ແລະ ຈັດລຽງບຸລິມະສິດແຕ່ລະເປົ້າໝາຍ ຕາມເງື່ອນໄຂທີ່ກຳນົດໃນດຳລັດ 272/ລບ ແລະ 241/ນຍ, ພ້ອມທັງ ເອົາໃຈໃສ່ລົງໂຄສະນາເຜີຍແຜ່ ແລະ ອະທິບາຍ ການປະຕິບັດນະໂຍບາຍ ເພື່ອໃຫ້ສັງຄົມມີຄວາມເຂົ້າໃຈກວ້າງຂວາງ . ພ້ອມດຽວກັນ ການປະສານສົມທົບ ເກັບກຳຂໍ້ມູນຕ້ອງມີຄວາມຊັດເຈນ ເຊິ່ງທາງກົມນະໂຍບາຍຕໍ່ຜູ້ມີຜົນງານ, ຄົນພິການ ແລະ ຜູ້ອາຍຸສູງ ໄດ້ລົງສົມທົບ ກັບທ້ອງຖິ່ນເພື່ອກວດກາ ແລະ ສົມທຽບຂໍ້ມູນຄືນ ບັນດາເປົ້າ ໝາຍສະເໜີຂໍນະໂນບາຍ ຫຼາຍແຂວງເຫັນວ່າ ມີຫຼາຍເປົ້າໝາຍຂໍ້ມູນບໍ່ທັນຄົບຖ້ວນ ບໍຖືກເງື່ອນໄຂ. (ໃນນັ້ນແຂວງ ບໍ່ແກ້ວ ເປັນແຂວງທຳອິດທີ່ປິດບັນຊີ ຜູ້ຮ້ອງຂໍນະໂຍບາຍ 5 ເປົ້າໝາຍບຸລິມະສິດ). 
ວຽກງານສັງຄົມສົງເຄາະໃຫ້ເອົາໃຈໃສ່ໃນການກຽມພ້ອມຕອບໂຕ້ໄພພິບັດ ໃນລະດູຝົນທີ່ຈະມາເຖິງ, ຮັບຮອງເອົາ ແຜນກຽມພ້ອມຕອບໂຕ້ໄພພິບັດ ປີ 2019 ໃນກອງປະຊຸມລັດຖະບານເປີດກວ້າງ ຄັ້ງທີ 1 ປີ 2019, ທີ່ບັນດາເຈົ້າແຂວງທົ່ວປະເທດໄດ້ເຂົ້າຮ່ວມ ເນື່ອງຈາກ ໄພພິບັດທາງທຳມະຊາດ ຕ້ອງໄດ້ຕິດຕາມພະຍາກອນອາກາດ, ການເຕືອນໄພ ແລະ ມີການເຝົ້າລະວັງ ເມື່ອເກີດໄພພິບັດຂື້ນ ຕ້ອງໃຫ້ການຊ່ວຍເຫຼືອສຸກເສີນ ໃຫ້ທັນເວລາ, ສຳຄັນພື້ນທີ່ຂອບເຂດທີ່ມີຄວາມສ່ຽງ ຈະເກີດນໍ້າຖ້ວມ, ພາຍຸ, ອັກຄີໄພ ແລະ ແຫ້ງແລ້ງ ຕ້ອງໄດ້ປຸກລະດົມກຳລັງແຮງງພາຍໃນ ແລະ ຂໍການຊ່ວຍເຫຼືອຈາກຕ່າງປະເທດ ພາຍໃນສັງຄົມຕ້ອງຊ່ວຍເຫຼືອກັນ, ສາມາດສ້າງກອງທຶນຊ່ວຍເຫຼືອໄພພິບັດ ຫຼື ກອງທຶນສົງເຄາະ ຂັ້ນແຂວງ, ຂັ້ນເມືອງ ເພື່ອລະດົມທຶນແກ້ໄຂໄພພິບັດຍາມສຸກເສີນ ເຊັ່ນດຽວກັນການຊ່ວຍເຫຼືອສົງເຄົາະ ໃຫ້ແກ່ຜູ້ທຸກຍາກ, ດ້ອຍໂອກາດໃນສັງຄົມ, ເດັກປ່ຽວພອຍ, ຄົນຂໍທານ, ບ້າໄບ້ເສຍຈິດ ແມ່ນໃຫ້ເອົາໃຈໃສ່ ໃນການຈັດສັນງົບປະມານສົງເຄາະ ແລະ ເຄື່ອງຊ່ວຍເຫຼືອ , ພ້ອມທັງຊຸກຍູ້ພາກສ່ວນຕ່າງໆ ໃຫ້ການຊ່ວຍເຫຼືອ, ວຽກໜຶ່ງທີ່ເປັນວຽກສະເພາະ ແມ່ນການສົງເຄາະເດັກ ແລະ ຜູ້ຖືກເຄາະຮ້າຍຈາກການຄ້າມະນຸດ . ພິເສດເດີນທາງມາຄັ້ງນີ້ ກະຊວງກໍໄດ້ນໍາເອົາເຄື່ອງຊ່ວຍເຫຼືອ ຈຳນວນໜຶ່ງມາມອບໃຫ້ ນອກຈາກເຂົ້າຊ່ວຍເຫຼືອຈາກ ກອງທຶນເພື່ອນຮ່ວມງານຂອງ ລັດຖະບານຍີປູ່ນທີ່ໄດ້ຈັດສົ່ງໃຫ້ບັນດາແຂວງໃນທົ່ວປະເທດ ຂໍໃຫ້ທາງພະແນກ ປະສານສົມທົບ ການແຈກຍາຍມອບເຂົ້າ ແລະ ເຄື່ອງຊ່ວຍເຫຼືອໃຫ້ແກ່ບັນດາເມືອງ ໃຫ້ຮອດໃຫ້ເຖິງປະຊາຊົນ ຜູ້ປະສົບໄພ ແລະ ຫຍຸ້ງຍາກຂາດເຂີນເພື່ອແກ້ໄຂບັນເທົາທຸກສຸກເສີນ.
ວຽກງານປະກັນສັງຄົມ ແລະ ກອງທຶນປະກັນສັງຄົມແຫ່ງຊາດ, ໃຫ້ເອົາໃຈໃສ່ຕິດຕາມ ການເບີກຈ່າຍເງິນບໍານານ, ເສຍອົງຄະ, ການຈ່າຍຜ່ານລະບົບທະນາຄານ ໃຫ້ແຕ່ລະເປົ້າໝາຍ ຫ່າງໄກຊອກຫຼີກ ໃຫ້ໄດ້ຮັບຢ່ງທົ່ວເຖິງ ລົງໂຄສະນາເຜີຍແຜ່ ແລະ ແນະນຳການຈັດຕັ້ງປະຕິບັດ ກົດໝາຍ ວ່າດ້ວຍ ປະກັນສັງຄົມ ສະບັບປັບປຸງ ໃຫ້ຫົວໜ່ວຍແຮງງານ ເພື່ອຈະຫຍາຍອັດຕາການປະກັນສັງຄົມ ໃຫ້ບັນລຸຕາມແຜນການທີ່ວາງໄວ້ ໂດຍສະເພາະ ການໃຫ້ບໍລິການໃນຂັ້ນເມືອງເພື່ອອຳນວຍຄວາມສະດວກ ການປະຕິບັດອຸດໜູນປະເພດຕ່າງໆ.
ວຽກງານການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ ໃຫ້ປັບປຸງວຽກງານການປະສານງານ ລະຫວ່າງ ຄຊກລ ແລະ ຄກລ ສອງພາກສ່ວນນີ້ ໃຫ້ກົມກຽວ ແລະ ວຽກງານໃຫ້ໄປລວງດຽວກັນ ສຳຄັນແມ່ນການປັບປຸງ ແລະ ສ້າງຄວາມເຂັ້ມແຂງ ໃນການເກັບກຳ ແລະ ສ້າງຖານຂໍ້ມູນ, ການສ້າງແຜນ ຕິດພັນກັບສະພາບຕົວຈິງ, ການຢັ້ງຢືນຂໍ້ມູນໃຫ້ຖືກຕ້ອງ ສ້າງຄວາມເຊື່ອໝັ້ນໃຫ້ແກ່ ບັນດາປະເທດ ແລະ ອົງການຜູ້ໃຫ້ທຶນ, ລາຍງານໃຫ້ເປັນປົກກະຕິ ແລະ ມີການຕິດຕາມກວດກາແຕ່ລະໄລຍະ. ໂດຍສຸມໃສ່ໂຄສະນາຜົນຮ້າຍ ຂອງລະເບີດບໍ່ທັນແຕກ ໃຫ້ແກ່ປະຊາຊົນ ພ້ອມໃຫ້ການຊ່ວຍເຫຼືອທີ່ຈຳເປັນໃຫ້ແກ່ ຜູ້ຖືກອຸບັດເຫດຈາກລະເບີດ ໃຫ້ໄດ້ຕາມແຜນທີ່ວາງໄວ້.
ວຽກງານກາແດງ ໃຫ້ມີການຊີ້ນຳ ແລະ ຮ່ວມຊີວິດການເມືອງ ຂອງໜ່ວຍພັກ ເປັນປົກກະຕິ ໂດຍໃຫ້ມີການລາຍງານເປັນແຕ່ລະໄລຍະ ສືບຕໍ່ຈັດຕັ້ງປະຕິບັດວຽກງານວິຊາການຂອງຕົນ ສຸມໃສ່ການໂຄສະນາ, ປຸກລະດົມໃຫ້ປວງຊົນທົ່ວແຂວງ ໃຫ້ການບໍລິຈາກເລືອດ ເພື່ອຊ່ວຍ ເຫຼືອກັນແລະກັນໃນສັງຄົມ ພ້ອມນີ້ ໃຫ້ສືບຕໍ່ປຸກລະດົມການຊ່ວຍເຫຼືອຈາກພາຍໃນ ແລະ ຕ່າງປະທດ ໃນການຊ່ວຍເຫຼືອຜູ້ເຄາະຮ້າຍຈາກໄພພິບັດ ແລະ ອຸບັດຕິເຫດໃນທົ່ວສັງຄົມ ແລະ ວຽກງານອື່ນໃຫ້ ປະສົບຜົນສຳເລັດເປັນກ້າວໆ./

( ຂ່າວ ຮສສ: ເພັດສະໄໝ)

ຂ່າວສານອື່ນໆ