ເບີໂທລະສັບ: +85621 2130 03/2227 77, ອີເມວ: suthanu1974@gmail.com

ລັດຖະມົນຕີກະຊວງ ຮສສ ຕ້ອນຮັບການເຂົ້າຢ້ຽມຂ່ຳນັບເຈົ້າຊາຍແຫ່ງຊອກດານີ.

25-10-2019, 13:21 257

ລັດຖະມົນຕີກະຊວງ ຮສສ ຕ້ອນຮັບການເຂົ້າຢ້ຽມຂ່ຳນັບເຈົ້າຊາຍແຫ່ງຊອກດານີ.

IMG_7477

ໃນວັນທີ 24 ຕຸລາ 2019 ທີ່ກະຊວງແຮງງານ ແລະ ສະຫວັດດີການສັງຄົມ(ຮສສ), ທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ເຈົ້າຊາຍ ມິເຣດ ຣາອາດເຊອິດ ອາວ-ຮຸດເຊັນ (Mired Raad Zeid Al-Hussein), ແຫ່ງຊອກດານີ ປະເທດຈໍແດນ, ໃນນາມຜູ້ຕາງໜ້າພິເສດຂອງສົນທິສັນຍາວ່າດ້ວຍ ການເກືອດຫ້າມລະເບີດຝັງດິນຕ້ານບຸກຄົນ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 23-24 ຕຸລາ 2019. ໂດຍມີຈຸດປະສົງຂອງການເພື່ອແລກປ່ຽນບົດຮຽນ ໃນວຽກງານເກັບກູ້ສິ່ງເສດເຫລືອຈາກປາງສົງຄາມ ແລະ ສົ່ງເສີມການຮ່ວມມືໃນດ້ານການຊ່ວຍເຫລືອຜູ້ໄດ້ຮັບຜົນກະທົບ.

IMG_7540
ໃນໂອກາດດັ່ງກ່າວ, ທ່ານ ຄຳແພງ ໄຊສົມແພງ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ເຈົ້າຊາຍແຫ່ງຊອກດານີ ພ້ອມດ້ວຍຄະນະ ໃນການເດີນທາງມາຢ້ຽມຢາມ ສປປ ລາວ ໃນຄັ້ງນີ້ ເຊິ່ງເປັນເຫດການທີ່ສຳຄັນ ສະແດງໃຫ້ເຫັນເຖິງສາຍພົວພັນ ແລະ ການຮ່ວມມືທີ່ດີຂອງ ສປປ ລາວ ແລະ ວົງຄະນະຍາດສາກົນໃນໄລຍະຜ່ານມາ ເປັນຕົ້ນແມ່ນການປະຕິບັດພັນທະຕໍ່ສາກົນຂອງ ສປປ ລາວ ໃນບັນຫາທີເປັນບູລິມມະສິດຂອງລັດຖະບານໃຫ້ບັນລຸຕາມຄາດໝາຍທີ່ວາງໄວ້ ໂດຍສະເພາະແມ່ນບັນຫາລູກລະເບີດທີ່ຍບໍທັນແຕກ ແລະ ຍັງຕົກຄ້າງຢູ່ ສປປ ລາວ.

IMG_7505
ໃນໂອກາດດຽວກັນ, ເຈົ້າຊາຍ ມິເຣດ ຣາອາດເຊອິດ ອາວ-ຮຸດເຊັນ ກໍໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີກະຊວງ ຮສສ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ໃຫ້ຄໍາໝັ້ນສັນຍາວ່າ ຈະສືບຕໍ່ຊຸກຍູ້ສົ່ງເສີມວຽກງານ ການເກັບກູ້ລະເບີດທີ່ຍັງບໍ່ທັນແຕກ ແລະ ຍັງຕົກຄ້າງຢູ່ ສປປປ ລາວ ແລະ ຈະເຮັດສຸດຄວາມສາມາດ ເພື່ອເຮັດໃຫ້ການພົວພັນ ຮ່ວມມືຂອງສອງຝ່າຍ ໃຫ້ໄດ້ຮັບການ ພັດທະນາ ແລະ ເກີດດອກອອກຜົນຍິ່ງໆຂຶ້ນ. ເຈົ້າຊາຍ ມິເຣດ ໄດ້ກ່າວວ່າ: ການມາຢ້ຽມຢາມ ສປປ ລາວ ຂອງຕົນແມ່ນເປັນຄັ້ງທີ່ 3 ແລະ ຈະບໍ່ແມ່ນຄັ້ງສຸດທ້າຍສຳລັບການຢ້ຽມຢາມ ສປປ ລາວ ເພາະປະເທດລາວເປັນປະເທດທີ່ສວຍງາມ, ເຊິ່ງຂ້າພະເຈົ້າພ້ອມດ້ວຍຄະນະ ໄດ້ໄປຢ້ຽມຢາມສະຖານທີ່ສຳຄັນຢູ່ ແຂວງຫລວງພະບາງທີ່ເປັນເມືອງມໍລະດົກໂລກຂອງລາວ ໂດຍສະເພາະຢ້ຽມຢາມໂຄງການເກັບກູ້ລະເບີດ ທີ່ບ້ານຫາດຍາ, ເມືອງປາກອູ ເພື່ອຕິດຕາມ ແລະ ເກັບກຳສະພາບຕົວຈິງໃນການເກັບກູ້ລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ເຊິ່ງການແກ້ໄຂບັນຫາດັ່ງກ່າວເປັນໜຶ່ງໃນບູລິມະສິດຂອງລັດຖະບານລາວ.

IMG_7553
ສົນທິສັນຍາວ່າດ້ວຍການເກືອດຫ້າມການນຳໃຊ້ລະເບີດຝັງດິນຕ້ານບຸກຄົນ ຫລື ສົນທິສັນຍາໂອຕາວາ (Ottawa Convention) ໄດ້ມີການເລີ່ມລົງນາມໃນປີ 1997 ແລະ ມີຜົນບັງຄັບໃຊ້ໃນວັນທີ 01 ມີນາ 1999. ປະຈຸບັນມີ 164 ປະເທດ ທີ່ໃຫ້ສັດຕະຍາບັນ, 1 ປະເທດ ລົງນາມແລ້ວ, ເຖິງວ່າ ສປປ ລາວ ຍັງບໍ່ໄດ້ເປັນພາຄີ ແຕ່ກໍ່ໃຫ້ການສະໜັບສະໜູນຈຸດປະສົງ ແລະ ເປົ້າໝາຍທາງດ້ານມະນຸດສະທຳ ຂອງສົນທິສັນຍາ ໂອຕາວາ ແລະ ໄດ້ເຂົົ້າຮ່ວມກອງປະຊຸມລັດພາຄີໃນຖານະປະເທດສັງເກດການ. ປັດຈຸບັນ, ລັດຖະບານ ພວມສຸມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 05 ປີ ຄັ້ງທີ 8 (2016 - 2020) ແລະ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ, ເຊິ່ງ ສປປ ລາວ ໄດ້ຮັບຮອງເອົາເປົ້າໝາຍແຫ່ງຊາດ ເປົ້າໝາຍທີ່ 18 “ຊິວິດປອດໄພຈາກລະເບີດທີ່ບໍ່ທັນແຕກ” ທີ່ມີເປົ້າໝາຍແນ່ໃສ່ຫຼຸດຜ່ອນຜົນກະທົບຈາກລະເບີດທີ່ບໍ່ທັນແຕກ ຕໍ່ການດຳລົງຊິວິດຂອງປະຊາຊົນລາວ ແລະ ການພັດທະນາປະເທດ. ສະນັ້ນ, ການແກ້ໄຂບັນຫາດັ່ງກ່າວ ຈຶ່ງແມ່ນບັນຫາຮີບດ່ວນເມື່ອທຽບໃສ່ ບັນຫາລະເບີດຝັງດີນ.

(ຂ່າວສານຮສສ: ເພັດສະໄໝ)

ຂ່າວສານອື່ນໆ