ເບີໂທລະສັບ: +85621 2130 03/2227 77, ອີເມວ: suthanu1974@gmail.com

ສປປ ລາວ ເປັນເຈົ້າພາບຈັດການແຂ່ງຂັນ ກິລາເຕະບານ ຄົນພິການທາງສະໝອງ-ປັນຍາ ໃນປະເທດລຸ່ມແມ່ນໍ້າຂອງຄັ້ງທີ IX .

28-11-2019, 15:10 64

70195219_1178149142384035_4390553902001422336_o

ສປປ ລາວ ເປັນເຈົ້າພາບຈັດການແຂ່ງຂັນ ກິລາເຕະບານ ຄົນພິການທາງສະໝອງ-ປັນຍາ ໃນປະເທດລຸ່ມແມ່ນໍ້າຂອງຄັ້ງທີ IX . ໃນລະຫວ່າງວັນທີ 27-28 ພະຈິກ 2019 ທີ່ສະໝາມກິລາ ເຈົ້າອານຸວົງ, ນະຄອນຫຼວງວຽງຈັນ. ໂດຍການເປັນປະທານກ່າວເປີດ ໂດຍ ທ່ານ ປອ ຄຳແພງ ໄຊສົມແພງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ທັງເປັນຮອງປະທານ, ຜູ້ປະຈຳການປະທານຄະນະກຳມະການແຫ່ງຊາດ ເພື່ອຄົນພິການ, ມີບັນດາທ່ານ ທູຕານຸທູດ, ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ, ຜູ້ຕ່າງໝ້າຈາກບັນດາກະຊວງ, ອົງການທຽບເທົ່າ, ຜູ້ຕາງໝ້າອົງການ ສະເປໂຊໂອແຫລມປິກ ປະຈຳພາກພຶ້ນອາຊີ-ປາຊີຟິກ, ບັນດາທ່ານແຂກຖືກເຊີນ, ບັນດາຄູຝຶກ, ຜູ້ປົກຄອງ, ຄອບຄົວຄົນພິການ, ນັກກິລາ ສະເປໂຊໂອແລມປິກ, ນ້ອງນັກຮຽນ ແລະ ຊາວນະຄອນຫລວງວຽງຈັນ ເຂົ້າຮວ່ມຢ່າງຫຼວງຫຼາຍ.

76732949_1178149032384046_7560310358531899392_o
ລັດຖະບານ ໄດ້ເອົາໃຈໃສ່ ຕໍ່ການຮ່ວມມືກັບພາກພຶ້ນ ແລະ ສາກົນ ລວມທັງອົງການຈັດຕັ້ງຕ່າງໆ ທັງພາຍໃນ ແລະ ຕ່າງປະເທດ ໃນການຊ່ວຍເຫລືອ ແລະ ພັດທະນາຄົນພິການລາວ, ເຊິ່ງ ສປປ ລາວ ກໍໄດ້ຮັບການຊ່ວຍເຫລືອ ໃນຫລາຍໂຄງການຈາກ ຕ່າງປະເທດ, ບັນດາໂຄງການເຫຼົ່ານັ້ນ ໄດ້ສ້າງໂອກາດໃຫ້ແກ່ຄົນພິການເຂົ້າເຖິງການສຶກສາ ດ້ວຍການສົ່ງເສີມ ການສຶກສາຮຽນຮ່ວມ ລະຫວ່າງຄົນພິການ ແລະ ຄົນບໍ່ພິການ. ຜ່ານການຈັດຕັ້ງປະຕິໃນຊຸມປີຜ່ານມາ ເຫັນວ່າ ເດັກພິການໄດ້ເຂົ້າຮຽນຮ່ວມຈຳນວນ 12,274 ຄົນ ໃນນີ້ມີເພດຍິງ 5,349 ຄົນ, ເດັກພິການທາງສະໝອງ ແລະ ປັນຍາ 98 ຄົນ, ພິການສາຍຕາ 142 ຄົນ ແລະ 10 ຄົນແມ່ນຮຽນຢູ່ ມະຫາວິທະຍາໄລແຫ່ງຊາດ. ສຳລັບການຝຶກວິຊາຊີບ, ລັດຖະບານ ໄດ້ສ້າງສູນຝຶກວິຊາຊີບແກ່ຄົນພິການ 2 ແຫ່ງ ໃນນັ້ນ ສູນພັດທະນາແມ່ຍິງພິການ ໄດ້ຊ່ວຍພາກລັດ ສ້າງບຸກຄະລະກອນໄດ້ຈຳນວນ 1,520 ຄົນ (ເປັນຍິງ 902 ຄົນ) ແລະ ສ້າງວຽກເຮັດງານທໍາ ໃຫ້ຄົນພິການນັບມື້ນັບຫລາຍຂື້ນ. ມາຮອດປະຈຸບັນ, ມີຄົນພິການ ເຂົ້າເຮັດວຽກນຳພາກລັດ 25 ຄົນ, ພາກເອກະຊົນ 167 ຄົນ, ເຮັດວຽກນຳໂຄງການ 109 ຄົນ ແລະ ປະກອບອາຊີບດ້ວຍຕົນເອງ 645 ຄົນ. ດ້ານການຟື້ນຟູ ແລະ ການປິ່ນປົວສຸຂະພາບ ຄົນພິການ ກໍໄດ້ຈັດການບໍລິການໃຫ້ຫລາຍຂື້ນ ແລະ ມີການຂະຫຍາຍ ສູນຟຶ້ນຟູການແພດໝ້າທີ່ການ ໄປສູ່ບັນດາແຂວງທີ່ຈຳເປັນ ເພື່ອສະໜອງການບໍລິການ ໃຫ້ຄົນພິການໄດ້ເຂົ້າເຖິງການປິ່ນປົວ ແລະຟື້ນຟູ. ໄປຄຽງຄູ່ກັນນັ້ນ ກໍໄດ້ສ້າງ ໂຮງງານອົງຄະທຽມ ທີ່ ບ້ານເກີນຕື່ມອີກ 1 ແຫ່ງ, ຜ່ານການສະໜອງບໍລິການ ໃນໄລຍະຜ່ານມາ ສະມາດຜະລິດອົງຄະທຽມໄດ້ 3,831 ອັນ, ສະໜອງລໍ້ເລື່ອນຄົນພິການໄດ້ 3,967 ຄັນ, ເກີບຄົນພິການ 650 ຄູ່, ສະໜອງໄມ້ຄໍ້າເທົ້າ, ເຄື່ອງຝັງຫູ, ແລະ ແວ່ນຕາ ໄດ້ 1,987 ອັນ.

78266097_1178149315717351_664318298367721472_o
ດ້ານການກິລາ ລັດຖະບານ ໄດ້ແຕ່ງຕັ້ງຄະນະຮັບຜິດຊອບ ພາລາແຫລມປິກ ແລະ ສະເປໂຊໂອ ແຫລມປິກ ເພື່ອສົ່ງເສີມ ຄົນພິການໄດ້ຫລີ້ນກິລາ ໂດຍສະເພາະ ຄົນພິການທາງສະໝອງ ແລະ ປັນຍາ. ຄະນະຮັບຜິດຊອບກິລາດັ່ງກ່າວ ກໍໄດ້ພ້ອມກັນເຄື່ອນໄຫວ ຝຶກແອບ ແລະ ແຂ່ງຂັນໃນລະດັບ ປະເທດ, ລະດັບອາຊຽນ, ລະດັບອາຊີ-ປາຊີຟິກ ແລະ ລະດັບໂລກ ເຊັ່ນ: ກິລາພາລາແຫລມປິກ ແລະ ສະເປໂຊໂອແຫລມປິກ ນັກກິລາ ຂອງ ສປປ ລາວ ໄດ້ສ້າງຊື່ສຽງໃຫ້ແກ່ປະເທດ ຈາກການເຂົ້າຮ່ວມແຂ່ງຂັນລະດັບໂລກ ທີ່ນະຄອນຫຼວງປັກກິງ, ສ.ປ ຈີນ, ນະຄອນລອສແອນເຈີລິດ, ສະຫະລັດອາເມລິກາ ແລະ ນະຄອນອາບູດາບີ, ສະຫະລັດ ອາລັບ ເອມມີເລດ, ສາມາດຍາດໄດ້ຫລຽນຄຳ ທັງໝົດ 5 ຫລຽນ, ຫລຽນເງິນ 3 ຫລຽນ ແລະ ຫລຽນທອງ 6 ຫລຽນ.

76927714_1178178699047746_3246545979247165440_o
ໂອກາດທີ່ ທ່ານ ປອ ຄຳແພງ ໄຊສົມແພງ ໃນນາມ ຮອງປະທານ ຜູ້ປະຈຳການ ຄະນະກຳມະການແຫ່ງຊາດ ເພື່ອຄົນພິການ ແລະ ຜູ້ອາຍຸສູງ ໄດ້ກ່າວວ່າ: ການຈັດການແຂ່ງຂັນ ກິລາຄົນພິການ ທາງສະໝອງ ແລະ ປັນຍາ ຄັ້ງທີ 9 ຂອງບັນດາປະເທດລຸ່ມ ແມ່ນໍ້າຂອງ ທີ່ ສປປ ລາວ ເປັນເຈົ້າພາບໃນຄັ້ງນີ້, ເຊິ່ງໄລຍະຜ່ານມາບັນດາປະເທດລຸ່ມແມ່ນໍ້າຂອງ ກໍໄດ້ໝູນວຽນກັນເປັນເຈົ້າພາບມາແລ້ວ, ສະນັ້ນ ການເປັນເຈົ້າພາບໃນຄັ້ງນີ້ ຈິ່ງມີຄວາມສຳຄັນ ແລະ ເປັນຄັ້ງທຳອິດ ຂອງ ສປປ ລາວ, ເຊິ່ງຄົນພິການລາວ ໄດ້ມີໂອກາດແລກປ່ຽນບົດຮຽນທີ່ດີ, ທັງເປັນການຫັດແອບ ແລະ ສະແດງຄວາມສາມາດຂອງຕົນ ໃນເວທີພາກພຶ້ນ ແລະ ພ້ອມທັງໄດ້ຮຽກຮ້ອງມາຍັງ ຄະນະຮັບຜິດຊອບການແຂ່ງຂັນໃນຄັ້ງນີ້ ຈົ່ງປະຕິບັດລະບຽບການແຂ່ງຂັນ ໃຫ້ມີຄວາມຖືກຕ້ອງ ແລະ ຍຸຕິທຳ, ຫຼີກຫຼ່ຽງການຕັດສິນທີບໍ່ເປັນທຳ. ຂໍຮຽກຮ້ອງມາຍັງນັກກິລາ ແຕ່ລະປະເທດ ຈົ່ງພ້ອມກັນຫລີ້ນກິລາ ດ້ວຍນໍ້າໃຈນັກກິລາ, ຊະນະ ຫລື ເສຍ ເປັນເກມກິລາ, ນີ້ແມ່ນກົດເກນຂອງການແຂ່ງຂັນ ພ້ອມນີ້ ຮຽກຮ້ອງໃຫ້ກ້ອງເຊຍນັກກິລາ ທ່ານຜູ້ຊົມທຸກໆທ່ານ ຈົ່ງພ້ອມກັນສະໜັບ ສະໜູນ ແລະ ເຊຍກິລາດ້ວຍຄວາມເບີກບານມ່ວນຊື່ນ.

76728922_1178179002381049_5954755865645940736_o
ສຳລັບການຊ່ວຍເຫລືອ ແລະ ການສະໜັບສະໜູນ ທາງດ້ານວັດຖຸ, ປັດໃຈ ກໍຄືທຶນຮອນ ເຂົາໃນການຈັດການແຂ່ງຂັນກິລາເຕະບານ ຄົນພິການທາງສະໝອງ ແລະປັນຍາ ໃນຄັ້ງນີ້ ແມ່ນເປັນການປະກອບສ່ວນທີ່ສຳຄັນຫຼາຍ ເພາະເປັນການພັດທະນາ ຄົນພິການທາງສະໝອງ ແລະ ປັນຍາ ໃຫ້ໄດ້ມີສ່ວນຮ່ວມກິດຈະກຳທາງສັງຄົມ ແນໃສ່ເຮັດໃຫ້ເຂົາເຈົ້າມີສຸຂະພາບທີດີ ແລະ ມີຊີວິດການເປັນຢູ່ທີ່ດີຂື້ນ ເທື່ອລະກ້າວ ຕາມແນວທາງນະໂຍບາຍ ແລະ ຄວາມຕັ້ງໃຈ ຂອງພັກ ແລະ ລັດຖະບານລາວ ໃນແຕ່ລະໄລຍະ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງ./

( ຂ່າວ ຮສສ: ເພັດສະໄໝ )

 

ຂ່າວສານອື່ນໆ