ເບີໂທລະສັບ: +85621 2130 03/2227 77, ອີເມວ: suthanu1974@gmail.com

ກອງ​ປະຊຸມ​ລັດຖະມົນຕີ​ສະຫວັດດີ​ການ​ສັງຄົມ ​ແລະ​ການ​ພັດທະນາອາ​ຊຽນ ຄັ້ງ​ທີ 10 ​ໄຂ​ຂຶ້ນ​ຢ່າງ​ເປັນ​ທາງ​ການ.

28-11-2019, 14:07 57

ກອງ​ປະຊຸມ​ລັດຖະມົນຕີ​ສະຫວັດດີ​ການ​ສັງຄົມ ​ແລະ​ການ​ພັດທະນາອາ​ຊຽນ ຄັ້ງ​ທີ 10 ​ໄຂ​ຂຶ້ນ​ຢ່າງ​ເປັນ​ທາງ​ການ.
75103846_1172525022946447_2789033693371432960_n

​ ໃນວັນທີ 21 ພະຈິກ 2019, ທີ່ໂຮງແຮມດອນຈັນພາເລດ, ນະຄອນຫຼວງວຽງຈັນ, ໄດ້ມີພິທີເປີດກອງປະ ຊຸມລັດຖະມົນຕີສະຫວັດດີການສັງຄົມ ແລະ ການພັດທະນາ ອາຊຽນ ຄັ້ງທີ 10 ແລະ ກອງປະຊຸມທີ່ກ່ຽວຂ້ອງ, ໃຫ້ກຽດກ່າວເປີດໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແຫ່ງ ສປປ ລາວ, ມີບັນດາລັດຖະມົນຕີ, ຮອງລັດຖະມົນຕີສະຫວັດດີການສັງຄົມ ແລະ ການພັດທະນາ ອາຊຽນ ແລະ ຮອງເລຂາທິການໃຫຍ່ອາຊຽນ ພ້ອມທັງ ຄະນະຜູ້ແທນອາຊຽນ ແລະ ແຂກຖືກເຊີນເຂົ້າຮ່ວມ

76956970_1178224099043206_7537919976758312960_n
ທ່ານ ຄຳ​ແພງ ​ໄຊ​ສົມ​ແພງ ລັດຖະມົນຕີ​ກະຊວງ​ແຮງ​ງານ ​ແລະ​ສະຫວັດດີກາ​ນສັງຄົມ ​ໄດ້​ລາຍ​ງານ​ໃຫ້​ຮູ້​ວ່າ: ກອງ​ປະຊຸມ​ລັດຖະມົນຕີ​ສະຫວັດດີ​ການ​ສັງຄົມ ​ແລະ​ ການ​ພັດທະນາ​ອາ​ຊຽນ ຄັ້ງທີ 10, ກອງ​ປະຊຸມ​ລັດຖະມົນຕີ​ສະຫວັດດີ​ການ​ສັງຄົມ ​ແລະ​ການ​ພັດທະນາ​ອາ​ຊຽນ ບວກ​ສາມ ຄັ້ງ​ທີ 6 ​ແລະ​ກອງ​ປປະຊຸມ​ປິ່ນ​ອ້ອມ ​ເຊິ່ງຈັດ​ຂຶ້ນ​ໃນ​ລະຫວ່າງ​ວັນ​ທີ 18-22 ພະຈິກ 2019 ທີ່​ນະຄອນຫຼວງວຽງ​ຈັນ, ພາຍ​ໃຕ້ຫົວ​ຂໍ້ “ການ​ສ້າງ​ຄວາມ​ເຂັ້ມ​ແຂງ​ວຽກ​ງານ​ປົກ​ປ້ອງ​ສັງຄົມ​ສຳລັບ​ເດັກ​ດ້ອຍ​ໂອກາດ ​ໃນ​ອາ​ຊຽນ”,
​ໂດຍ​ກອງ​ປະ​ຊຸມ​ໄດ້ພ້ອມ​ກັນ​ປຶກສາ​ຫາລື ລະຫວ່າງ​ພາກ​ລັດຖະບານ ​ແລະ​ອົງການ​ບໍ່​ສັງກັດ​ລັດຖະບານ ຄັ້ງ​ທີ 14, ​ໄດ້​ຈັດ​ຂຶ້ນ​ໃນ​ວັນ​ທີ 18 ພະຈິກ ຜ່ານ​ມາ ທີ່​ສຸມ​ໃສ່​ປຶກສາ​ຫາລື ​ເພື່ອ​ຊອກ​ຫາ​ຊ່ອງ​ທາງ​ໃນ​ການ​ແກ້​ໄຂ​ບັນຫາ​ເດັກ​ດ້ອຍ​ໂອກາດ​ໃນ​ອາ​ຊຽນ; ກອງ​ປະຊຸມ​ເຈົ້າໜ້າ​ທີ່​ອາວຸ​ໂສ​ສະຫວັດ​ດີການ​ສັງຄົມ ​ແລະ​ການ​ພັດທະນາ​ອາ​ຊຽນຄັ້ງ​ທີ 15 ຈັດຂຶ້ນລະຫວ່າງ 19-20 ພະຈິກ ​ເພື່ອ​ປຶກສາ​ຫາລື ​ແລະ​ທົບ​ທວນຄືນ​ການຈັດ​ຕັ້ງ​ປະຕິບັດ​ບັນດາ​ຖະ​ແຫຼງການ ​ເປັນຕົ້ນ ຖະ​ແຫຼງການ​ອາ​ຊຽນກ່ຽວ​ກັບ​ສ້າງ​ຄວາມ​ເຂັ້ມ​ແຂງ​ວຽກ​ງານ​ປົກ​ປ້ອງ​ສັງຄົມ, ຜູ້​ອາຍຸ​ສູງ, ຄົນ​ພິການ, ການ​ລົບ​ລ້າງ​ການ​ນຳ​ໃຊ້​ຄວາມ​ຮຸນ​ແຮງ​ຕໍ່​ເດັກນ້ອຍ, ລາຍ​ງານ​ຄວາມ​ຄືບ​ໜ້າການ​ຈັດ​ຕັ້ງ​ປະຕິບັດ​ແຜນ​ຍຸດ​ທະ​ສາດ ​ແລະ​ກິດຈະກຳ​ຕ່າງໆ​ໃນ​ໄລຍະ 1 ປີຜ່ານມາ ແລະ​ວາງ​ທິດ​ທາງ​​ແຜນການ​ຕໍ່ໜ້າ; ກອງ​ປະຊຸມ​ເຈົ້າໜ້າ​ທີ່​ອາວຸ​ໂສ ສະຫວັດດີ​ການ​ສັງຄົມ ​ແລະ​ການ​ພັດທະນາ​ອາ​ຊຽນ ບວກສາມ ຄັ້ງ​ທີ 14 ຈັດ​ຂຶ້ນ​ໃນ​ວັນ​ທີ 20 ພະ​ຈິກ ​ເພື່ອ​ທົບ​ທວນ​ບັນດາ​ແຜນການ/​ໂຄງການ ຮ່ວມ​ມື​ລະຫວ່າງ​ອາ​ຊຽນ ​ແລະ​ບັນດາ​ປະ​ເທດ​ບວກ​ສາມ; ກອງ​ປະຊຸມ​ລັດຖະມົນຕີ​ສະຫວັດດີ​ການ​ສັງຄົມ ​ແລະ​ການ​ພັດທະນາ​ອາ​ຊຽນ ຄັ້ງ​ທີ 10 ທີ່​ຈັດ​ຂຶ້ນ​ໃນວັນ​ທີ 21 ພະຈິກ​​ນີ້ ​ເພື່ອ​ປຶກສາ​ຫາລື​ກ່ຽວ​ກັບ​ຄວາມ​ຄືບ​ໜ້າການ​ຈັດ​ຕັ້ງ​ປະ​ຈິ​ບັດ​ວຽກ​ສະຫວັດດີ​ການ​ສັງຄົມ ​ແລະ​ການ​ພັດທະນາ​ອາ​ຊຽນ ​ແຕ່​ປີ 2016 ຈົນ​ເຖິງ​ປະຈຸ​ບັນ ​ແລະ​ກອງ​ປະຊຸມ​ລັດຖະມົນຕີ​ສະຫວັດດີ​ການ​ສັງຄົມ ​ແລະ​ການ​ພັດທະນາ​ອາ​ຊຽນບວກ​ສາມ ຄັ້ງ​ທີ 6 ​ໃນ​ວັນ​ທີ 22 ພະຈິກ 2019 ​ເພື່ອ​ປຶກສາ​ຫາ​ລື​ກ່ຽວ​ກັບ​ຄວາມ​ຄືບ​ໜ້າ​ໃນ​ການ​ຮ່ວມ​ມື​ລຫວ່າງ​ອາ​ຊຽນກັບປະ​ເທດ​ບວກ​ສາມ ​ໄລຍະ​ຜ່ານ​ມາ ​ແຕ່​ປີ 2016 ຮອດ​ປະຈຸ​ບັນ ​ແລະ​ແຜນ​ຮ່ວມ​ມື​​ໃນ​ຕໍ່ໜ້າ

75481845_1172525049613111_2151934788896817152_n
​ໂອກາດ​ດຽວ​ກັນ ທ່ານ ສົມ​ດີ ດວງ​ດີ ​ໄດ້ສະ​ແດງ​ຄວາມ​ຊົ​ມ​ເຊີຍ​ຕໍ່​ຜົນງານ ກໍ​ຄື ບົດບາດ​ອັນ​ສຳຄັນ​ຂອງ​ບັນດາ​ລັດຖະມົນຕີ​ປະ​ເທດ​ສະມາຊິກ​ອາ​ຊຽນ ​ເພື່ອ​ປະກອບສ່ວນ​ເຂົ້າ​ໃນ​ການ​ສ້າງ​ປະຊາ​ຄົມ​ອາ​ຊຽນ 2025 ​ໂດຍ​ສະ​ເພາະ​ການ​ສ້າງ​ປະຊາ​ຄົມ​ອາ​ຊຽນ​ໃນ​ໄລຍະ​ທີ່​ຜ່ານ​ມາ, ພ້ອມ​ເນັ້ນຢ້ຳຕໍ່​ກອງປະຊຸມລັດຖະມົນຕີສະຫວັດດີການສັງຄົມ ແລະ ການພັດທະນາອາຊຽນ ຄັ້ງທີ 10 ແລະ ບັນດາກອງປະຊຸມກ່ຽວຂ້ອງຄັ້ງນີ້ ທີ່ຈັດຂຶ້ນພາຍໃຕ້ຫົວຂໍ້: “ການສ້າງຄວາມເຂັ້ມແຂງວຽກງານປົກປ້ອງສັງຄົມສໍາລັບເດັກດ້ອຍໂອກາດ” ໂດຍເລັ່ງໃສ່ 1). ​ຮັດແໜ້ນວຽກປົກປ້ອງສັງຄົມ ໃຫ້ມີລັກສະນະກວມລວມ, ເທົ່າທຽມກັນ ແລະ ຮັບປະກັນການມີສ່ວນຮ່ວມ ແລະ ໄດ້ຮັບຜົນປະໂຫຍດຂອງທຸກພາກສ່ວນໃນສັງຄົມ ໂດຍສະເພາະ ເດັກດ້ອຍໂອກາດ, ຜູ້ພິການ ແລະ ຜູ້ສູງອາຍຸທີ່ປ່ຽວພອຍ; 2). ຍົກສູງການເຂົ້າເຖິງການບໍລິການ ແລະ ການປົກປ້ອງສັງຄົມໃຫ້ມີຄວາມສະດວກ, ວ່ອງໄວ, ມີຄວາມກຽມພ້ອມ, ຄົບວົງຈອນ, ມີຄຸນນະພາບ, ເທົ່າທຽມກັນ ແລະ ມີຄວາມຍືນຍົງ; 3). ເພີ່ມທະວີການພົວພັນຮ່ວມມື ແລະ ລະດົມຂົນຂວາຍທຶນຮອນ, ເຕັກນິກວິຊາການ ຈາກຄູ່ເຈລະຈາອາຊຽນ, ຄູ່ຮ່ວມມືພາຍນອກ, ອົງການ​ຈັດ​ຕັ້ງ​ສາກົນ ລວມທັງ ອົງການ​ຈັດ​ຕັ້ງ​ສາກົນ​ບໍ່​ສັງກັດ​ລັດຖະບານ ເພື່ອມີສ່ວນຮ່ວມໃນການຈັດຕັ້ງປະຕິບັດໃຫ້ບັນລຸຜົນສຳເລັດສູງຂຶ້ນ.

75204544_1172525092946440_118166876869099520_n
ທ່ານ​ຮອງ​ນາຍົກລັດຖະມົນຕີ ຍັງ​ກ່າວ​ຕື່ມ​ວ່າ: ເພື່ອເປັນການສືບຕໍ່ຊຸກຍູ້ ໃນການຈັດຕັ້ງຜັນຂະຫຍາຍຄໍາໝາຍໝັ້ນ, ບັນດາແຜນວຽກ ແລະ ວິໄສທັດທີ່ຜູ້ນໍາໄດ້ຮັບຮອງເອົາແລ້ວໃຫ້ກາຍເປັນຮູບປະທໍາໃນຕໍ່ໜ້າ, ທ່ານ​ຮອງ​ນາຍົກລັດຖະມົນຕີ ຍັງ​ໄດ້ສະ​ເໜີ​ໃຫ້​ບັນດາ​ລັດຖະມົນຕີ​ອາ​ຊຽນ ສືບຕໍ່ຊຸກຍູ້ໃຫ້ຂະແໜງການກ່ຽວຂ້ອງປະຕິບັດແຜນວຽກ 2016-2020 ໃຫ້ມີປະສິດທິພາບກວ່າເກົ່າ ເພື່ອປະກອບສ່ວນເຂົ້າໃນການສ້າງປະຊາຄົມອາຊຽນໃຫ້ມີຄວາມເຂັ້ມແຂງຂຶ້ນກວ່າເກົ່າ ໂດຍສະເພາະ ສະເໜີໃຫ້ມີການທົບທວນກາງສະໄໝການຈັດຕັ້ງປະຕິບັດແຜນແມ່ບົດການສ້າງປະຊາຄົມວັດທະນະທໍາ-ສັງຄົມ 2025 ແລະ ໃຫ້ຄົ້ນຄວ້າລະອຽດໃນການກໍານົດເອົາບູລິມະສິດສໍາຄັນຕ່າງໆເຂົ້າໃນການຮ່າງແຜນວຽກໃໝ່ 2021-2025; ສືບຕໍ່ນໍາເອົາແຜນງານເສີມສ້າງຊຶ່ງກັນແລະກັນ 2020-2025 (Complementarities Roadmap 2020-2025) ທີ່ຜູ້ນໍາໄດ້ຮັບຮອງເອົາໃນກອງປະຊຸມສຸດຍອດອາຊຽນ-ສປຊ ຄັ້ງທີ 10 ຜ່ານມາ ທີ່ບາງກອກ ເພື່ອນໍາໄປຈັດຕັ້ງປະຕິບັດໃຫ້ປະກົດຜົນເປັນຈິງ; ແລະໃຫ້ສືບຕໍ່ເພີ່ມທະວີການພົວພັນຮ່ວມມືກັບບັນດາປະເທດຄູ່ເຈລະຈາ, ຄູ່ຮ່ວມມືພາຍນອກ, ອົງການຈັດ ຕັ້ງສາກົນ ແລະ ທຸກພາກສ່ວນທີ່ກ່ຽວຂ້ອງ ບໍ່ວ່າຈະເປັນພາກລັດ ແລະ ເອກະຊົນ ເພື່ອພ້ອມກັນປະກອບ ສ່ວນເຂົ້າໃນວຽກສະຫວັດດີການສັງຄົມໃຫ້ນັບມື້ນັບດີຂຶ້ນ. /

( ຂ່າວສານ ຮສສ : ເພັດສະໄໝ ພິມມະສອນ)

ຂ່າວສານອື່ນໆ