ເບີໂທລະສັບ: +85621 2130 03/2227 77, ອີເມວ: suthanu1974@gmail.com

ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ(ຮສສ)ໄດ້ຖະແຫຼງຂ່າວ ຜ່ານສື່ມວນຊົນ

28-11-2019, 14:16 96

78107341_1175430619322554_2657650115505815552_o
 
ທ່ານ ປອ. ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ(ຮສສ)ໄດ້ຖະແຫຼງຂ່າວ ຜ່ານສື່ມວນຊົນ ໄດ້ຮັບຊາບ ກ່ຽວກັບຜົນສຳເລັດຂອງການຈັດກອງປະຊຸມລັດຖະມົນຕີສະຫວັດດີການສັງຄົມ ແລະ ການພັດທະນາ ອາຊຽນ ຄັ້ງທີ 10, ກອງປະຊຸມເຈົ້າໜ້າທີ່ອາວຸໂສສະຫວັດດີການສັງຄົມ ແລະ ການພັດທະນາ ອາຊຽນ ຄັ້ງທີ 15 ແລະ ກອງປະຊຸມປິ່ນອ້ອມ ທີ່ ສປປ ລາວ ເປັນເຈົ້າພາບ ໃນວັນທີ 18-22 ພະຈິກ 2019 , ທີ່ນະຄອນຫຼວງວຽງຈັນ, ນີ້ວ່າ: ສປປ ລາວ ໄດ້ຮັບກຽດ ເປັນເຈົ້າພາບ ແລະ ເປັນປະທານກອງປະຊຸມລັດຖະມົນຕີ ສະຫວັດດີການສັງຄົມ ແລະ ການພັດທະນາອາຊຽນ ຄັ້ງທີ 10 ໃນປີນີ້ ພາຍໃຕ້ຫົວຂໍ້ທີ່ວ່າ: “ສ້າງຄວາມເຂັ້ມແຂງວຽກປົກປ້ອງສັງຄົມສຳລັບເດັກດ້ອຍໂອກາດ ໃນອາຊຽນ” ຊຶ່ງມີບັນດາກອງປະຊຸມ ດັ່ງນີ້:
1). ກອງປະຊຸມລັດຖະມົນຕີສະຫວັດດີການສັງຄົມ ແລະ ການພັດທະນາ ອາຊຽນ ຄັ້ງທີ 10;
2). ກອງປະຊຸມລັດຖະມົນຕີສະຫວັດດີການສັງຄົມ ແລະ ການພັດທະນາ ອາຊຽນ ບວກສາມ ຄັ້ງທີ
6 ມີບັນດາຄູ່ຮ່ວມເຈລະຈາ ຄື: ສາທາລະນະລັດປະຊາຊົນຈີນ, ສາທາລະນະລັດເກົາຫລີ ແລະ
ຍີ່ປຸ່ນ.
3). ກອງປະຊຸມເຈົ້າໜ້າທີ່ອາວຸໂສສະຫວັດດີການສັງຄົມ ແລະ ການພັດທະນາ ອາຊຽນ ຄັ້ງທີ 15;
4). ກອງປະຊຸມເຈົ້າໜ້າທີ່ອາວຸໂສສະຫວັດດີການສັງຄົມ ແລະ ການພັດທະນາ ອາຊຽນ ບວກສາມ
ຄັ້ງທີ 14 ມີບັນດາຄູ່ຮ່ວມເຈລະຈາ ຄື: ສາທາລະນະລັດປະຊາຊົນຈີນ, ສາທາລະນະລັດເກົາຫລີ ແລະ ຍີ່ປຸ່ນ.
5). ກອງປະຊຸມປືກສາຫາລື ລະຫວ່າງລັດຖະບານ ແລະ ອົງການຈັດຕັ້ງບໍ່ສັງກັດລັດຖະບານ ຄັ້ງທີ 14.

ກອງປະຊຸມລັດຖະມົນຕີສະຫວັດດີການສັງຄົມ ແລະ ການພັດທະນາອາຊຽນ ຄັ້ງທີ 10 ແລະ ກອງປະຊຸມປິ່ນອ້ອມ ຄັ້ງນີ້ ໄດ້ດຳເນີນມາເປັນເວລາ 5 ວັນ, ຂ້າພະເຈົ້າ ຂໍຖືໂອກາດອັນມີຄວາມໝາຍສຳຄັນນີ້ ແຈ້ງມາຍັງບັນດາທ່ານສື່ມວນຊົນຊາບວ່າ: ກອງປະຊຸມດັ່ງກ່າວ ໄດ້ປິດລົງດ້ວຍຜົນສຳເລັດອັນຈົບງາມ ແລະ ໄດ້ຮັບຜົນສຳເລັດຕາມຄາດໝາຍທີ່ໄດ້ວາງໄວ້ ຊຶ່ງກອງປະຊຸມກໍໄດ້ປຶກສາຫາລື ແລະ ເອກະພາບກັນບາງບັນຫາຕົ້ນຕໍ ດັ່ງນີ້:
1). ຮັບຊາບຜົນຂອງກອງປະຊຸມຕ່າງໆ ພາຍໃຕ້ເສົາຄໍ້າວັດທະນະທໍາ-ສັງຄົມ ແລະ ກອງປະຊຸມອາຊຽນອື່ນໆ ທີ່ໄດ້ຈັດຂື້ນ ໂດຍສະເພາະກິດຈະກຳຕ່າງໆທີ່ຜູ້ນຳອາຊຽນໄດ້ເຫັນດີ ແລະ ມີທິດຊີ້ນຳ ໃນກອງປະຊຸມສຸດຍອດອາຊຽນ ຄັ້ງທີ 35 ຜ່ານມາ ທີ່ບາງກອກ ປະເທດໄທ;
2). ກອງປະຊຸມໄດ້ຮັບຮອງຖະແຫລງການຮ່ວມ ຂອງກອງປະຊຸມລັດຖະມົນຕີ ສະຫວັດດີການ ແລະ ການພັດທະນາອາຊຽນ ຄັ້ງທີ 10 ແລະ ຖະແຫລງການຮ່ວມຂອງກອງປະຊຸມລັດຖະມົນຕີ ສະຫວັດດີການ ແລະ ການພັດທະນາອາຊຽນ ບວກ 3 ຄັ້ງທີ 6;
3). ຮັບຮອງເອົາບົດລາຍງານເຈົ້າໜ້າທີ່ອາວຸໂສສະຫວັດດີການສັງຄົມ ແລະ ການພັດທະນາອາຊຽນຄັ້ງທີ 14 ທີ່ສິງກະໂປ ໃນປີ 2018 ແລະ ບົດລາຍງານເຈົ້າໜ້າທີ່ອາວຸໂສສະຫວັດດີການສັງຄົມ ແລະ ການພັດທະນາອາຊຽນ ຄັ້ງທີ 15 ທີ່ນະຄອນຫລວງວຽງຈັນ ຊຶ່ງໄດ້ຈັດຂື້ນໃນວັນທີ 19-20 ພະຈິກ 2019;
4). ກອງປະຊຸມໄດ້ຮັບຮອງເອົາບົດລາຍງານການຈັດຕັ້ງປະຕິບັດແຜນງານ ຄະນະກຳມະການອາຊຽນ ວ່າດ້ວຍການປົກປ້ອງ ແລະ ສົ່ງເສີມສິດທິແມ່ຍີງ ແລະ ເດັກນ້ອຍອາຊຽນ ໄລຍະແຕ່ 2016-2020;
5). ກອງປະຊຸມໄດ້ແລກປ່ຽນວິໄສທັດ, ວຽກທີ່ເປັນບູລິມະສິດ ແລະ ບົດຮຽນທີ່ເປັນແບບຢ່າງທີ່ດີ ທີ່ຕິດພັນກັບວຽກປົກປ້ອງສັງຄົມ ສຳລັບເດັກນ້ອຍດ້ອຍໂອກາດ, ຜູ້ພິການ ແລະ ຜູ້ອາຍຸສູງ ຂອງແຕ່ລະປະເທດໃນອາຊຽນ ຊຶ່ງເປັນພື້ນຖານອັນສຳຄັນ ໃຫ້ແກ່ການທົບທວນແຜນຍຸດທະສາດສະຫວັດດີການສັງຄົມ ແລະ ການພັດທະນາອາຊຽນ 2016-2020 ຊຶ່ງເປັນຂໍ້ລິເລີ່ມໃຫ້ແກ່ການສ້າງແຜນຍຸດທະສາດ ສະຫວັດດີການສັງຄົມ ແລະ ການພັດທະນາອາຊຽນ ສະບັບໃໝ່ ໄລຍະ 2021-2025;
6). ກອງປະຊຸມໄດ້ຕີລາຄາສູງ ຕໍ່ການຮ່ວມມືລະຫວ່າງ ບັນດາປະເທດສະມາຊິກອາຊຽນ ແລະ ອາຊຽນ ບວກສາມ ຄື: ສາທາລະນະລັດປະຊາຊົນຈີນ, ສາທາລະນະລັດເກົາຫລີ ແລະ ຍີ່ປຸ່ນ ຊຶ່ງຍາມໃດກໍໃຫ້ການສະໜັບສະໜູນຢ່າງໃກ້ສິດ ໃນການຈັດຕັ້ງປະຕິບັດໂຄງການໄລຍະຜ່ານມາ ແລະ ໃຫ້ຄຳໝັ້ນສັນຍາຕໍ່ໂຄງການທີ່ສະເໜີໃໝ່ ໂດຍບັນດາປະເທດສະມາຊິກອາຊຽນ ຢ່າງເໝາະສົມ;

ໂດຍສັງລວມແລ້ວ, ສປປ ລາວ ໃນຖານະເປັນປະທານກອງປະຊຸມລັດຖະມົນຕີສະຫວັດດີການສັງຄົມ ແລະ ການພັດທະນາອາຊຽນ ຄັ້ງທີ 10 ແລະ ກອງປະຊຸມປິ່ນອ້ອມ ພາຍໃຕ້ຫົວຂໍ້ ““ສ້າງຄວາມເຂັ້ມແຂງວຽກປົກປ້ອງສັງຄົມສຳລັບເດັກດ້ອຍໂອກາດ ໃນອາຊຽນ” ຊຶ່ງຫົວຂໍ້ດັ່ງກ່າວແມ່ນມີຜົນປະໂຫຍດຫລາຍໃຫ້ແກ່ການປະກອບສ່ວນອັນສຳຄັນໃນການສ້າງຄວາມເຂັ້ມແຂງ ແລະ ການຮັດແໜ້ນຄວາມຮ່ວມມື ເພື່ອສົ່ງເສີມ ແລະ ປົກປ້ອງສິດທິເດັກ ໂດຍສະເພາະ ເດັກດ້ອຍໂອກາດໃນອາຊຽນ. ພ້ອມດຽວກັນນີ້, ຫົວຂໍ້ກອງປະຊຸມຄັ້ງນີ້ ກໍເປັນການຂະຫຍາຍຄຳໝາຍໝັ້ນອາຊຽນ, ວິໄສທັດອາຊຽນ 2025, ເປົ້າໝາຍການພັດທະນາແບບຍືນຍົງ 2030, ບັນດາຖະແຫລງການອາຊຽນຕ່າງໆ ເປັນຕົ້ນແມ່ນ ຖະແຫລງການອາຊຽນວ່າດ້ວຍ ການສ້າງຄວາມເຂັ້ມແຂງວຽກປົກປ້ອງສັງຄົມ ແລະ ຖະແຫລງການອື່ນໆ ທີ່ຕິດພັນກັບວຽກຜູ້ອາຍຸສູງ, ເດັກນ້ອຍ, ຜູ້ພິການ ແລະ ກຸ່ມຄົນດ້ອຍໂອກາດຕ່າງໆ.
ພ້ອມນີ້ ທ່ານ ຍັງໄດ້ແຈ້ງຕື່ມອີກວ່າ: ສຳລັບກອງປະຊຸມລັດຖະມົນຕີ ສະຫວັດດີການສັງຄົມ ແລະ ການພັດທະນາອາຊຽນ ຄັ້ງທີ 11 ແລະ ກອງປະຊຸມປິ່ນອ້ອມ ຈະໄດ້ຈັດຂຶ້ນທີ່ ປະເທດມາເລເຊຍໃນປີ 2022./

( ຂ່າວສານຮສສ: ເພັດສະໄໝ )
 
 
 
 
 

ຂ່າວສານອື່ນໆ